सुर्खेत । दैलेखको डुङ्गेश्वर गाउँपालिका–४ थापा गाउँमा खानेपानीको समस्या समाधान भएको छ । सोसेक नेपालको अगुवाइमा खानेपानी योजना निर्माण भएपछि थापा गाउँको खानेपानी समस्या समाधान भएको हो ।
हेल्भेटास नेपाल र एकीकृत जलश्रोत व्यवस्थापन कार्यक्रम र डुङ्गेश्वर गाउँपालिकाको साझेदारी तथा सोसेक नेपालको प्राविधिक तथा सामाजिक सहजिकरणमा थापा गाउँमा खानेपानी सुविधा पुगेको हो ।
योजनाको कुल लागत २६ लाख १९ हजार ३ सय रुपैयाँ रहेको सोसेक नेपालका फिल्ड प्राविधिक जयबहादुर विष्टले जानकारी दिए । हालै निर्माण सम्पन्न थापा गाउँ खानेपानी तथा सरसफाइ योजनाबाट गाउँका ३४ घरधुरीमा खानेपानीको सुविधा पुगेको छ । फिल्ड प्राविधिक विष्टका अनुसार ३४ घरधुरीका लागि घरैपिच्छे खानेपानीको धारा जडान भएको छ ।
योजना निर्माणसँगै थापा गाउँमा सरसफाइको विभिन्न गतिविधि समेत सञ्चालन भइरहेको छ । हरेक घरमा फोहोर फाल्ने खाडल र चाङ निर्माण गरिएको थापा गाउँ खानेपानी तथा सरसफाइ योजनाका अध्यक्ष गोविन्दबहादुर थापाले बताए । योजनाबाट लाभान्वित ३४ घरधुरीलाई फिल्टर समेत वितरण गरिएको अध्यक्ष थापाको भनाई छ ।
खानेपानी योजना निर्माण हुनुअघि थापा गाउँका स्थानीयले खानेपानीको समस्या झेल्दै आएका थिए । योजनाका कोषाध्यक्ष समेत रहेकी रेखा थापाले योजना निर्माण सम्पन्न भएपछि खानेपानीको समस्या समाधान भएको बताइन् ।
‘योजना निर्माण हुनु अघि फोहोर पानी प्रयोग गनुपथ्र्यो, टाढा टाढाबाट खानेपानीको जोहो गर्नुपर्ने बाध्यता थियो, चैत्र वैशाखमा त खानेपानीको हाहाकार हुन्थ्यो, उनले भनिन् । एक घर एक धारा निर्माण भएपछि खानेपानीको सबै समस्या हटेर गएको उनले बताइन् । घरमै धारा जडान भएपछि व्यक्तिगत तथा घरायसी सरसफाइमा पनि सहज भएको थापाको भनाई छ ।
थापा गाउँ खानेपानी तथा सरसफाइ योजनाका सचिव सुरेन्द्रबहादुर थापाका अनुसार खानेपानी योजनालाई दिगो बनाउन सबै लाभान्वित उपभोक्ताहरू प्रतिबद्ध रहेको बताए ।
प्रतिक्रिया