राजधानी लाइभ, काठमाडौं ।
नेकपा माओवादी केन्द्रका पोटिब्युरो सदस्य एवं प्रतिनिधि सभा सदस्य राजन दाहालले पुष्पमकल दाहाल प्रचण्ड नेतृत्वको सरकार नढल्ने बताएका छन् । नेपाली कांग्रेससहितका गठबन्धनका दलहरुबीच कुनै मतभेद नरहेको बताउँदै सरकार नढल्ने र यही गठबन्धनको सरकार ५ वर्षसम्म कायम रहने समेत उल्लेख गरे ।
मंगलबार राजधानी लाइभसँगको विशेष अन्तर्वार्तामा सांसद दाहालले भ्रष्ट र दलालहरू प्रचण्ड सरकारसँग आत्तिएको समेत बताए ।
उनले भने, ‘प्रचण्ड सरकारले जसरी भ्रष्टहरूलाई जेलमा कोच्ने काम गरिरहेको छ, यसबाट दलालहरू आत्तिएका छन् । उनीहरू सुत्न सकेका छैनन् । यसबाट सरकारलाई दिइएको समर्थन प्राविधिक रूपमा घटे पनि जनताको उत्साहजनक समर्थन छ । सरकार ढल्दैन, यही गठबन्धनको सरकार ५ वर्षसम्मै जान्छ ।’
यस्तै सांसद दाहालले पशुपतिनाथ मन्दिरमा जलहरि प्रकरणमा अख्तियार दुरुपयोग अनुसन्धान आयोगले एमाले अध्यक्ष केपी शर्मा ओलीलाई क्लिन चिट दिन खोजेको आरोप लगाएका छन् ।
उनले सरकारसँग कुनै पनि समन्वय नगरी अख्तियारले रातारात जलहरि जोख्ने कुरा शंकास्पद रहेको समेत उल्लेख गरे ।
‘एमाले अध्यक्ष ओलीलाई जोगाउन अख्तियारले रातारात अध्यक्ष ओलीलाई जोगाउन पशुपतिमा पुगेर जलहरि जोखेको नाटक गरेको छ । महालेखा परीक्षक कार्यालयले भ्रष्टाचार भएको भनेको विषयमा रातारात गरिएको यो चलखेल शंकास्पद छ ।’ उनले भने ।
हेर्नुहोस् सांसद दाहालबारे राजधानी लाइभले गरेको अन्तर्वार्ता (भिडियो)
प्रतिक्रिया